1.8.11

हिमाचली पहाड़ी भाषा मन्झा गिणती

हिमाचली पहाड़ी भाषा मन्झा गिणती पढने दा अलग तरीका हुंदा है. एथू ते लई की सौ तकर गिणती दितियो है. इसा जो पढ़ी करी तुसां जो घरे दी याद आई जाणी है.

1 =  इक                        2 =  दो
3 =  त्रै                           4   = चार
5   = पंज                      6   = छे 

7   = सत                      8   = अठ
9   = नो                        10 = दस
11 = ग्यारा                   12 = बारा 

13 = तेरा                      14 =  चोदह
15 =  पन्दरा                 16   = सोला
17   = सतारा                18   = अठारा 

19  = उन्नी                   20   = बी
21   = इक्की                 22 = बाई
23 = तरेइ                     24 = चोबी 

25 = पच्ची                    26 =  छ्यब्बी
27 =  सताई                  28   = अठाई
29   = उणत्ती                 30   = ती

31  = कत्ती                    32   = बत्ती 
33   = तेत्ती                    34 = चोती
35 = पैंती                      36 = छ्य्त्ती 

37   = सैंती                   38   = अठत्ती

39  = उन्ताली               40   = चाली
41   = कताली               42 = बताली
43 = तरताली                44 = चताली

45 = पन्ताली                 46 =  छताली 
47 =  सन्ताली               48   = अडताली 
49   = ऊणुन्जा              50   = पंजा

51   = कूंजा                   52 = बून्जा 
53 = त्र्युन्जा                  54 = चरुन्जा

55 = पचून्जा                 56 =  च्यून्जा 
57 =  सतून्जा                58   = अठुन्जा
59   = उणाट                  60   = सठ

61  = काट                     62 = बाट 
63 = तरेट                      64 = चोट

65 = पैंट                        66 =  छ्याट 
67 =  स्ताट                    68  = अठाट 
69 =  उणत्तर                  70   = सत्तर 

71  = कत्तर                    72 = बत्तर  
73 = तय्तर                    74 = चुअत्तर

75 = पचत्तर                    76 =  छयतर 
77 =  सत्ततर                  78  = अठतर 
79 =  उणाशी                  80   = अस्सी  

81  = कासी                    82 = बासी  
83 = त्र्यासी                    84 = चरासी

85 = पचासी                   86 =  छयासी  
87 =  सतासी                 88  = अठासी  
89 =  अणानुए               90   = नब्बे   

91  =  कानुए                  92 = बानुए  
  93 = त्र्यानुए                 94 = चरानुये
95 = पचानुये                 96 =  छ्यानुये  
97 =  सतानुये               98  = अठानुये 
99 =  नड़ीनुए                100   = सौ 

29.7.10

धोबण

काला घगरा सियाई के, ओ धोबण पाणीये जो चल्ली है मैं तेरी सो. णा
मत जांदी धोबणे तू मेरिये ओथु राजेयाँ डा डेरा है मैं तेरी सो.
धोबणे घड़ा सिरे चुकया धोबण पानीये जो गयी है मैं तेरी सो.
पहलिया पोडिया उत्तरी, राजे गिट्टूये दी मारी है मैं तेरी सो.
दूजिया पोडिया उत्तरी ओ राजें बांह फड लई है मैं तेरी सो
छड़ी देयां राजेंया बाईं जो, ओ मेरी जात कमीनी है मैं तेरी सो.
जाती दा मैं क्या करना ओ तेरी सूरत बड़ी सोणी है मैं तेरी सो.
आगे आगे राजा चल्या पीछे धोबणी दा डोला है मैं तेरी सो.
खबर करो महलां रानिया तेरी सोतन भी आई है मैं तेरी सो.
आई है ता ओणा दे मैं भी बसणा दी है मैं तेरी सो
अपु बैठी रानी पलगें धोबण पन्दी पर बिठाई है मैं तेरी सो.
कालियां पिन्नियां बणाइयां बिच जहर मिलाया है मैं तेरी सो.
खाई लेयां धोबणे तू पिन्नियां' बाजी प्योकियाँ ते आई है मैं तेरी सो.
पहली पीनी खायी है धोबणी ओ धोबण मूंदे मुन्हे पयी है मैं तेरी सो.
दूजी पिन्नी खायी है धोबणी, धोबण मरी मुक्की गयी है मैं तेरी सो.
चन्नणे दी सेज बनाई के धोबण नदिया रड़ाई है मैं तेरी सो.
आगे धोभी कपडेयां धोम्दा' पासे सेज रूडदी आई है मैं तेरी सो.
सेज गुआडी करी दिखया मेरी धोबन रूडदी आई है मैं तेरी सो.
सोनी सूरत वालिये कजो जान गुआई है मैं तेरी सो।




6.5.10

भरियाँ बंदूकां : हिमाचली लोकगीत

भरियाँ बंदूकां राजा होया तैयार
मारी जे लैणा सैले बागे दा मोर
न तुसां मारे ओ राजा चिड़ियाँ तोते
न तुसां मारे ओ सैले बागे दा मोर
क्या ता लगदे ओ राणी चिड़ियाँ तोते
क्या ता लगदा सैले बागे दा मोर
सासु दे जाये राजा चिड़ियाँ तोते
अम्मा
दा जाया सैले बागे दा मोर
भारियां बंदूकां राजें खेल्या शकार
मारी जे ल्यंदा सैले बागे दा मोर
उठो जी राणी करयो रसो
अव्वल बनायो सैले बागे दा मोर
बखिया
भी पेड सिरे भी पेड
मेते नी बंणदा सैले बागे दा मोर
उठो जी राणी तुसां खाई लो रसो
छैल बणाया सैले बागे दा मोर
उत्त्चे
ते छड़ी की रानिये दीती है छाल
जान गुआणी ओ वीरा तेरे ही नाल





यह गाणा इक्की राणिया दी काणी है . सैले बागे दे मोरे तिसा दा भाऊ था अपर राजें तिद्दा शकार करी लय. दुखी होई करी राणीये भी जान देई दित्ती .

15.4.10

63 साल का हुआ हिमाचल

15 अप्रैल को हिमाचल दिवस पर विशेष


हिमाचल प्रदेश कालि बणया था. इसा गल्ला दा जबाव बोत लोक नी जाणदे. हिमाचल दे अन्दर कने बाहर मते सरे लोकां दा ख्याल है भई हिमाचल 1971 बिच पंजाबे ते लग करी की बणया था. यह ख्याल गलत है. हिमाचल प्रदेश 15 अप्रैल 1948 जो बणया था. उस टैम असां दा देश छोटियां-छोटियां रियासतां थियां. शिमला ताली भी बड़ा मशहूर था. अंग्रेजां दी गर्मियां दी राजधानी थी शिमला. देश आजाद होने ते बाद राजधानी दिल्ली बनी गयी. पंडित जवाहरलाल नेहरु दिया सरकारें शिमले दे नेड़े दियां 30 रियासतां मलाई करी प्रदेशे जो चीफ कमिश्नर एरिया बणाइ दित्ता. इना रियासतां बिच 26 शिमले दियां थियां कने चार पंजाबे दियां थियां. ये रियासतां थियां..भगाट, भज्जी, बागल, बेजार, बलसन, बुशहर, चंबा, दरकोटी, देलाथ, डाडी, धामी, घुण्ड, जुब्बल, खनेटी, कुमारसेन, कुनिहार, कुठार, मंडी, मधान, महलोग, मांगल, रतेश, कियोंथल, रविनगढ़, सांगरी, सिरमौर, सुकेत, थरोच कने ठियोग
इना रियासतां जो मलाई करी चार जिले चंबा, मंडी, सिरमौर कने महासू बणाये गये थे. सन 1948 बिच बने इस हिमाचले दा कुल एरिया 27,169 वर्ग किलोमीटर था. हिमाचल बनाणे दे कम्मे बिच डाक्टर यशवंत सिंह परमार जी ने बोत ज्यादा मेन्नत कित्ती थी। सन १९५१ बिच हिमाचल सेक्शन सी दा राज्य बणी गया। इसते इक साल बाद
हिमाचले दी पहली सरकार बणी कने इसा दे मुख्यमंत्री थे डाक्टर परमार। हिमाचले दे पहले उप-राज्यपाल थे मेजर जनरल हिम्मत सिंह जी।
उस टैम बिलासपुर भी सेक्शन सी दा लग राज्य था। एक जुलाई 1956 जो बिलासपुर भी हिमाचल च मलाई दित्ता गया कने यह प्रदेशे डा पंजमा जिला बणी गया। केंद्र सरकारें सन 1953 बिच राज्य पुनर्गठन आयोग बणाया था. इन्नी सन 1956 बिच अपणी रिपोर्ट जमा कित्ती कने गलाया भई भारते मंजा जितने भी सी सेक्शन दे राज्य हैं सै पडोसी राज्यां बिच मलाई देणे चाइदे. इस आयोगे दे तिन मेम्बर थे. अध्यक्ष न्यायमूर्ति फाजिल अली ते अलावा दोयो सदस्य एच एन कुंजरू कने सरदार के एम् पन्निकर चाहंदे थे की हिमाचले जो पंजाब बिच मलाई दित्ता जाये. अपण फाजिल अली साहब दी गल मनोई कने इस ही साल हिमाचल जो केंद्र शासित प्रदेश बणाई दित्ता गया. सन 1960 बिच महासू जिले दी किन्नी तहसील लग जिला बणाई गयी. इस तरह किन्नोर हिमाचले डा छेम्मा जिला बणाया गया.
एक नवम्बर 1966 च जाली पंजाब ते लग करी की हरियाणा बणाया गया ता उस टाइम पंजाब दे पहाड़ी इलाके कुल्लू, कांगड़ा, डलहोजी वगेरह हिमाचले बिच पाई दित्ते गये. इसा नोइयाँ जगह ते चार नोए जिले कुल्लू, लाहौल स्पीती, कांगड़ा कने शिमला बणे. इस्ते हिमाचले दे दस जिले होई गै. कने एरिया होई गया 55673 वर्ग किलोमीटर.
बोत लम्बे संघर्शे ते बाद 25 जनवरी 1971 जो हिमाचल पूरा राज्य बणी गया. डाक्टर यशवंत सिंह परमार जी दी मेन्नत रंग लाई कने इस शुभ दिन इंदिरा गाँधी सरकार ने हिमाचल जो केंद्र शासित प्रदेश ते पूरे प्रदेशे दा दर्जा देई दित्ता. इस्ते एक साल बाद कांगड़ा जिले जो बंडी करी हमीरपुर और ऊना बनाये गये.

5.4.10

हुंण वो कतायें जो नसदा वो धुडुआ: हिमाचली लोकगीत

हुंण वो कतायें जो नसदा वो धुडुआ
बापुएं लडें तेरे ओ लायी

रिडिया ता रिडिया धुडू भला नसदा
नालें ता खोलें गौरां तोपदी

कजो वो कुआरी बाबुल दे घरें
अज वो ब्याइयाँ कजो भला छोडदा

गौरां ता गोरां हक्कां वो लाइयाँ
गोरां ता हक्का ना वो सुनदी

मगरियां चालीं चल मेरे धुडुआ
नाजुक पैरां छाले ओ आये

छन्द छन्द धुडुआ भाली ओ लयां
नाजुक लत्ता ना चलदी

मलिया रा कूड़ा मलिया सुटना
ना तेरी धीयाँ ना तेरी जोतनी

असं भला होंदे मलिया रे जोगी
तू ता हुंदी राजे दे बेटी

उचेयाँ कैलाशा शिव मेरा बसदा
कुन वो ग्लांदा गौरां नी बसदा

हुंण वो कतायें जो नसदा वो धुडुआ
बापुएं लडें तेरे ओ लायी





भगवान् शिव कन्ने माता पार्वती पर बणया ये गाणा बोत पराणा हिमाचली लोकगीत है. इस गाणे मंजा शिव भगवान् जो धुदु कन्ने माता पार्वती जो गोरां गलाया है. तुसां इस गाणे जो गायक करनैल राणा दिया आवाज बिच ऊपर दीते लिंक पर सूनी सकदे.

23.3.10

हुण टैम आया हिमाचली पहाड़ी भाषा दा

कुसी वी भाषा दे विकास च लोक साहित्य रा टकोदा योगदान होंदा ऐ। लोक साहित्य उस भाषा दी पुरातनता कनैं समृद्धता दा वी प्रतीक ऐ। हिमाचली वी आधुनिक भारती भाषां च उतणी ई पुराणी भाषा ऐ जितणियां कि होर। इसके लिखित नमूने असां जो 16वीं शताब्दी च गुलेर दी राणी श्रीमती विक्रम दे थ्होंदे हन। आजादी ते पैह्लें पहाड़ी राजेयां दे ज़माने च एह् राजकाजे दी भाषां तां रेही कन्नैं ई कन्नैं एह् कोर्ट कचैहरियां च वी प्रजोग होंदी रेही ऐ। पुराणे हस्तलेख कनैं पांडुलिपियां दी खोजा ते परन्त असां जो इसा दे इसते पैह्लैं वी प्रजोग होणे दे कई सबूत वी मिल्ले हन। एह् सब कोई अचरज व्हाली गल्ल नीं ऐ।
लोक साहित्य हमेशा लोकां मुख जुआन्नी इक पीड़िया तैं दूईया पीड़िया जो थमाहेया ऐ। हिमाचली भाषा च अनगिणत लोक गीत, लोक कथां, लोक कहावतां, लोक मुहावरे, लोकोक्तियां, बुझारतां, बारां, कारकां, झेह्ड़े कनैं गाथां मौजूद हन। मता किछ लोक साहित्य रा गीतां, लोक कथां, मुहावरेयां कनैं लोकोक्तियां दे रूपे च किट्ठा करी छपी नैं असें दे सामणें औणे दी पक उम्मीद ऐ। लोक साहित्य असें हिमाचली लोकें दे सामाजिक आस्था-विश्वासें रीति रिवाजां कनैं संस्कृतियां जो दर्शांदा ऐ। मुख जुआन्नी चली औणे कनैं लोक गीतां, लोक कथां, झेहड़ेयां लोक गाथां बगैरा च थोड़ा-थोड़ा फर्क तां सबनी भाषां दे लोक साहित्य च जुग जुगां ते रैहंदा आया ऐ। एह् फर्क असें री हिमाचली भाषा च वी मिल्लै तां कोई नौईं गल्ल नीं ऐ।

लोकगीतां रे संकलन हिमाचली भाषा च सरकारी गैर-सरकारी कनैं लोकां दे अपणे बक्खुआ तोवी जरूर होए-न अपर लोक कथां मतियां ई घट किट्ठियां होइयां कनैं किताबां रे रूपे च असां रे सामणें घट ई छपी नैं आइयां न।

हिमाचली लोक कथां वी संस्कृत दी पंचतंत्र, हितोपदेश कनैं बृहतकथां सांई केई उपदेशां, नीतिवाकां आचरण-आदर्शां कनैं मनोरंजन-मिठासा सौगी भरियां हन। केई कथां दहियां वी हैन जिह्नां च कल़ी दर कल़ी जुड़दी चली जांदी ऐ। पहल्के समें च जदूं असें बच्चे थे तां देहयो दे काथू ज़रूर थे। असां वी अपणे बचपने च आचार्य दुर्गादत्त, महंतो दाईया कनैं अपणी माऊ श्रीमती सत्यावती गुलेरी तें केई कथां सुणियां थिह्यां। अज केई भुल्ली गेइयां कनैं केई आज भी दिल दिमागे च बणिया हैन। अज देहे काथू हण मते ई घट रेही गे हन। इसा हालता च देहो दे अनमोल कथां दे खजाने जो भविख ताईं सम्हाली रक्खणा बड़ा जरूरी ऐ। हिमाचली भाषा च पिछले 40 सालां तें मता विकास कनैं निखार आया ऐ। इक सांझी हिमाचली भाषा दा मानक रूप वी तुसां जो इह्नां कथां च सुज्झणां ऐ। थोड़ा बहुत अंतर सबनीं भाषा च रैहंदा ऐ एह् गल्ल असां रे सब विदुआन खरा करी जाणदे ई हन।

लिखारियां कुस तरीके नैं हिमाचली जो सजाणा-संबारणा ऐ एहे तुसां तिह्नां पर ई छड्डी देह्या। कदी एह् मत बोला कि इसा च बोलियां ई बड़ियां हैन। एह् गलणा तुसां रे घट भाषा ज्ञान जो दस्सदा ऐ। तुसां जो भाषां दी पूरी जाणकारी ई नी ऐ। कोई वी भाषा बिनां बोलियां ते नेहीं होंदी। बोलियां च ई भाषा चुप चपीती छुप्पी रैंह्दी समें औणे पर तिसा जो मानता मिलदी। हिंदी, बंगला, तमिल, तेलगू, गुजराती, पंजाबी, मराठी, डोगरी च क्या बोलियां नेहीं। भाषा विज्ञान तुसां पढ़न तां पता लग्गै। नेंही तां नौलां लेखा चीखदेयां रैह्णा—नहीं पता तां चुप तां चुप करी बैठी रेह्या।

एह् खुशी दी गल्ल ऐ कि साहित्य अकादमी रे बाद नेशनल बुक ट्रस्ट इंडिया रे अध्यक्ष प्रोफेसरे विपिन चन्द्र ने हिमाचली भाषा च कुछ किताबां छापणे दा प्रशंसा जोग फैसला लेया ऐ। कोई दो करोड़ हिमाचली भाषा-भाषियां जो राष्ट्रीय स्तर पर पन्छाण मिल्ली ऐ। इसे करी नैं मिंह्जो लोककथां रे चुणाः च मता सजग सचेत वी रैह्णा पेया ऐ। इस संकलन च लोककथां दे मते साते रूप भेद रुचियां दी जानकारी देणा वी इक खास उद्देश रेह्या ऐ। एह् लोककथां बच्चेयां, नौजुआनां कनैं बड्डेयां माहणुआं दा वी मनोरंजन करगियां कनैं दिल जितगियां एह् उमीद ऐ।


असें री हिमाचल सरकार जो वी अपणी कुंभकर्णी निन्द्र छड्डी हिमाचली भाषा जो एम.ए. तैं पढ़ाणे दे इन्तजाम करने ताईं हिमाचल यूनिवर्सिटी च हिमाचली रिसर्च सेंटर कनैं हिमाचली विभाग दी स्थापना करने दी कोशिशां तेज करना चाही-दियां हन।

(ए लेख हिमाचली लेखक डाक्टर प्रत्युष गुलेरी दिया कताबा 'हिमाचली लोक कथा' दिया भूमिका ते ल्या है.)